Programi Botëror i Ushqimit, pjesë e OKB-së ngre alarmin se numri i njerëzve që ndodhen në prag të urisë në 43 vende të botës po rritet çdo ditë.
Agjencia e Kombeve të Bashkuara tha se rritja e njerëzve që përballen me zinë e bukës shkoi brenda vitit nga 42 në 45 milionë njerëz.
Luftërat, ndryshimet e klimës dhe pandemia e Covid-19, janë ato që po rritin numrin e të uriturve në botë.
Kostoja e parandalimit të urisë në nivel botëror është rritur nga 6.6 miliardë Dollarë sa ishte në fillim të vitit në 7 miliardë duke paralajmeruar se burimet tradicionale të financimit janë të mbingarkuara.
Përballë pasigurisë ushqimore, familjet po detyrohen të bëjnë zgjedhje shkatërruese duke i martuar fëmijët më herët, duke i hequr nga shkolla apo edhe duke i shitur ato si një përpjekje e dëshpëruar për të mbijetuar.
Thatësira në Afganistan shënoi një rrënim ekonomik ndërsa 12,4 milionë njerëz në Siri nuk dinë se si do të sigurojnë vaktin e tyre pas konfliktit 10-vjeçar.
Vende të tjera të cilat po përballen gjithashtu me urinë ekstreme janë Etopia, Haiti, Angola, Kenia dhe Burundi.
