Mediat ukrainase sonte në mbrëmje kanë konfirmuar se megjithatë ndeshja ndërmjet Ukrainës dhe Kosovës do të luhet më 9 tetor në Krakovë të Polonisë, por me numër të kufizuar të tifozëve.
Në fakt, autoritetet polake fillimisht kanë refuzuar që kjo ndeshje të zhvillohet në Krakovë për shkaqe sigurie nga frika e përleshjeve të tifozëve ukrainas me ata polakë. Megjithatë, në momentet e fundit autoritetet ukrainase kanë arritur të bien dakord për zhvillimin e ndeshjes në Krakovë, por me kufizime të rënda, pasi autoritetet polake nuk do të lejojnë që në stadium të hyjnë më shumë se 1000 tifozë ukrainas. Më herët kryetari i FFK-së, Fadil Vokrri, ka deklaruar se janë njoftuar se ndeshja nuk do të luhet në Krakovë, por tash mbetet të shihet se cili do të jetë njoftimi zyrtar i Federatës ukrainase apo edhe i vetë FIFA-s për këtë çështje.
