Janë publikuar pamjet e shpëtimit të dy foshnjave që janë nxjerrë nga rrënojat e një tornadoje që ndodhi gjatë javës që lamë pas në shtetin amerikan të Kentakit.
Foshnjat ishin futur nga gjyshja e tyre në një vaskë, në mënyrë që të mbrohen nga rrënojat, derisa ato u gjetën nga ekipet e shpëtimit pa dëmtime në trup.
Në pamjet e kamerës së vendosur në trup të oficerëve të policisë në Kentaki, tregohet se si policia tenton ta ngrisë vaskën e përmbysur duke i gjetur të gjalla dhe pa lëndime foshnjat 15 dhe tre muajshe.
Ato u ribashkuan me gjyshen e tyre, përpara se të dërgoheshin në spital, raporton BBC.
“Vaska ishte ngritur dhe më kishte dalë nga duart, nuk mund ta mbaja dot”, tha gjyshja e foshnjave të mbijetuara, derisa po tregonte se si filloi të kërkonte kudo midis rrënojave për fëmijët. “Gjithçka që mund të thosha ishte, ‘Zot, të lutem që foshnjat e mia të jenë të sigurta”.
Pas stuhive shkatërruese që ndodhën në tetë shtete, 92 persona mbetën të vdekur, derisa 76 prej viktimave u regjistruan në Kentaki.
Përveç dhjetrave të vdekur, edhe qindra prona mbetën të shkatërruara nga më shumë se 40 tornado që goditën një zonë të gjerë më 10 dhe 11 dhjetor.
